Fylgstu með okkur á Facebook

Dalvísa

  • Fífilbrekka! gróin grund!
  • grösug hlíð með berjalautum!
  • flóatetur! fífusund!
  • fífilbrekka! smáragrund!
  • yður hjá ég alla stund
  • uni best í sæld og þrautum;
  • fífilbrekka! gróin grund!
  • grösug hlíð með berjalautum!
  •  
  • Gljúfrabúi, gamli foss!
  • gilið mitt í klettaþröngum!
  • góða skarð með grasahnoss!
  • gljúfrabúi, hvítur foss!
  • verið hefur vel með oss,
  • verða mun það enn þá löngum;
  • gljúfrabúi, gamli foss!
  • gilið mitt í klettaþröngum!
  •  
  • Bunulækur blár og tær!
  • bakkafögur á í hvammi!
  • sólarylur, blíður blær,
  • bunulækur fagurtær!
  • yndið vekja ykkur nær
  • allra best í dalnum frammi;
  • bunulækur blár og tær!
  • bakkafögur á í hvammi!
  •  
  • Hnjúkafjöllin himinblá!
  • hamragarðar! hvítir tindar!
  • heyjavöllinn horfið á
  • hnjúkafjöllin hvít og blá!
  • skýlið öllu helg og há!
  • hlífið dal er geysa vindar!
  • Hnjúkafjöllin himinblá!
  • hamragarðar! hvítir tindar!
  •  
  • Sæludalur! sveitin best!
  • sólin á þig geislum helli!
  • snemma risin, seint þá sest;
  • sæludalur! prýðin best!
  • þín er grundin gæðaflest,
  • gleðin æsku, hvíldin elli!
  • Sæludalur! sveitin best!
  • sólin á þig geislum helli!
Samið árið 1843.
Tvö eiginhandarrit eru til. Hið fyrra er varveitt á Landsbókasafni í handritasafni Jóns Sigurðssonar (JS 129 fol.). Hið síðara er varðveitt í Árnastofnun í handritasafni Konráðs Gíslasonar (KG 31 b V).
Frumprentun í: Fjölnir 7. ár, 1844.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847. [Fyrirsögn: „Dalvísur“].
Til fróðleiks
  • Vísubotn 2017 - vísnasamkeppni grunnskólanema
  • Raddir íslenskunnar 2017 - örmyndbönd
  • Dagur íslenskrar tungu 2017
  • Vísubotn 2016 - vísnasamkeppni grunnskólanema
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn