Fylgstu með okkur á Facebook

Alþing hið nýja

  • (1840)
  •  
  • Hörðum höndum
  • vinnur hölda kind
  • ár og eindaga;
  • siglir særokinn,
  • sólbitinn slær,
  • stjörnuskininn stritar.
  •  
  • Traustir skulu hornsteinar
  • hárra sala;
  • í kili skal kjörviður;
  • bóndi er bústólpi,
  • bú er landstólpi,
  • því skal hann virður vel.
  •  
  • Fríður foringi
  • stýri fræknu liði,
  • þá fylgir sverði sigur;
  • illu heilli
  • fer að orustu
  • sá er ræður heimskum her.
  •  
  • Sterkur fór um veg,
  • þá var steini þungum
  • lokuð leið fyrir;
  • ráð at hann kunni,
  • þó ríkur sé,
  • og hefðu þrír um þokað.
  •  
  • Bera bý
  • bagga skoplítinn
  • hvurt að húsi heim;
  • en þaðan koma ljós
  • hin logaskæru
  • á altari hins göfgva guðs.
  •  
  • Vissi það að fullu
  • vísir hinn stórráði.
  • Stóð hann upp af stóli,
  • studdist við gullsprota:
  • „Frelsi vil eg sæma
  • framgjarnan lýð,
  • ættstóran kynstaf
  • Ísafoldar.
  •  
  • Ríða skulu rekkar,
  • ráðum land byggja,
  • fólkdjarfir firðar
  • til fundar sækja,
  • snarorðir snillingar
  • að stefnu sitja;
  • þjóðkjörin prúðmenni
  • þingsteinum á.
  •  
  • Svo skal hinu unga
  • alþingi skipað
  • sem að sjálfir þeir
  • sér munu kjósa.
  • Gjöf hefi eg gefið,
  • gagni sú lengi
  • foldu og firðum
  • sem eg fremst þeim ann.“
  •  
  • Þögn varð á ráðstefnu,
  • þótt ríkur mæla,
  • fagureygur konungur
  • við fólkstjórum horfði;
  • stóð hann fyrir stóli,
  • studdist við gullsprota,
  • hvurgi getur tignarmann
  • tígulegri.
  •  
  • Sól skín á tinda.
  • Sofið hafa lengi
  • dróttir og dvalið
  • draumþingum á.
  • Vaki vaskir menn,
  • til vinnu kveður
  • giftusamur konungur
  • góða þegna.
Samið árið 1840.
Tvö eiginhandarrit eru til, annað er varðveitt á Landsbókasafni á sérstakri örk í handritasafni Jóns Sigurðssonar (JS 401 4to) en hitt er varðveitt í Árnastofnun í handritasafni Konráðs Gíslasonar (í sendibréfi til Konráðs Gíslasonar 2. ágúst 1841).
Frumprentun í: Fjölnir 6. ár, 1843.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn