Fylgstu með okkur á Facebook

Bjarni Thorarensen

  • Skjótt hefir sól brugðið sumri,
  • því séð hef eg fljúga
  • fannhvíta svaninn úr sveitum
  • til sóllanda fegri;
  • sofinn er nú söngurinn ljúfi
  • í svölum fjalldölum,
  • grátþögull harmafugl hnípir
  • á húsgafli hvurjum.
  •  
  • Skjótt hefir guð brugðið gleði
  • góðvina þinna,
  • ástmögur Íslands hinn trausti
  • og ættjarðarblóminn!
  • Áður sat ítur með glöðum
  • og orðum vel skipti,
  • nú reikar harmur í húsum
  • og hryggð á þjóðbrautum.
  •  
  • Hlægir mig eitt það að áttu
  • því uglur ei fagna,
  • ellisár örninn að sæti
  • og á skyldi horfa
  • hrafnaþing kolsvart í holti
  • fyrir haukþing á bergi;
  • floginn ertu sæll til sóla
  • þá sortnar hið neðra.
  •  
  • Glaðir skulum allir að öllu
  • til átthaga vorra
  • horfa, þá héðan sá hverfur
  • oss hjarta stóð nærri;
  • veit eg þá heimtir sér hetju
  • úr harki veraldar
  • foringinn tignar, því fagna
  • fylkingar himna.
  •  
  • Kættir þú margan að mörgu
  • - svo minnst verður lengi –
  • þýðmennið, þrekmennið glaða
  • og þjóðskáldið góða!
  • Gleðji nú guð þig á hæðum
  • að góðfundum anda,
  • friði þig frelsarinn lýða.
  • Far nú vel, Bjarni!
Samið árið 1841
Þrjú eiginhandarrit til. Hið fyrsta er varðveitt á Þjóðminjasafni (Þjms. 12172), annað er varðveitt á Landsbókasafni (Lsb. 3402 4to) og það þriðja er varðveitt í Konunglega bókasafninu í Kaupmannahöfn (Ny kgl. saml. 2004 fol. II).
Frumprentun í: Fjölnir 6. ár, 1843.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn