Fylgstu með okkur á Facebook

Guðmundur kaupmaður Guðmundsson

  • „Leiður er mér sjávar sorti
  • og sólgáruð bára“
  • síðan barma brutu
  • blíðan mér frá síðu.
  • Algildum hafa öldur
  • ótrúar gröf búið;
  • grimmar djúpt í dimmum
  • dauðasal hann falið.
  •  
  • „Eigi mega á ægi
  • ógrátandi líta“
  • móðir, systur, síðan
  • sjá ei bróður góðan;
  • löngum sjá þær lengi
  • lauguðum sjónbaugum
  • öldur á, og leita
  • að þeim er nam staðar.
  •  
  • Einatt úti sýnist
  • undir land á stundum
  • seglum skautuð sigla
  • sæhind þægum vindi.
  • Það er ei hann, sem Fanna
  • hallar leið að fjalli;
  • þoka er það sem rýkur
  • þýð á mari víðum.
  •  
  • „Sól gengur síð undir múla!
  • svo langar þig þangað“
  • ein sem ástin besta
  • ól á föðurbóli.
  • Hver veit hve langt leita
  • leiðar þarf nú arfi
  • hrelldrar móður, að kveldi
  • hennar í faðm renna?
  •  
  • Varð ekki í grænum garði
  • grafar auðið þeim dauða
  • greip á dökku djúpi
  • drómi, lífs úr blóma.
  • Blæju bláa ægir
  • breiddi yfir þig leiddan,
  • frændi! fyrr sem undir
  • fold og seimi heima.
  •  
  • Seggir af harmi hyggja
  • helst eiga, sem mega;
  • stutta stund að létta
  • starfa sinna. En minnast
  • eg með ástartrega
  • ætíð hlýt – því bætist
  • aldrei það eg þolda-
  • þín, minn bróðir góður!
Samið árið 1842.
Eiginhandarrit er varðveitt í Árnastofnun í handritasafni Konráðs Gíslasonar (KG 31 a II).
Frumprentun í: Skírnir, árið 1843.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn