Fylgstu með okkur á Facebook

Hugnun

  • Nautgæfa fóðurgrasið grær
  • á leiði móður þinnar þjáðu,
  • því ertu hljóður, frændi! sjáðu
  • hvar bóndi góður björg sér fær.
  •  
  • Þúfu sem slær hann undir er
  • sú ein sem kæran haft þig hefur,
  • í hjúpi væran dúr hún sefur;
  • heytuggu nær hann handa sér.
  •  
  • Hvar er nú prýðin fljóða frægst,
  • móðurorð blíð á mjúkum vörum,
  • málfærið þýða ljúft í svörum,
  • upplitið fríða ástarnægst?
  •  
  • Seinna meir skaltu sama veg;
  • raunar er kalt í rúmi þröngu
  • og rökkrið svalt – en fyrir löngu
  • þú veist það allt eins vel og ég.
  •  
  • Nú færðu ekki að sjá um sinn
  • meira af rekkju móður þinnar,
  • maðkur á bekki situr innar –
  • því hlærðu ekki, herra minn?
Samið árið 1844.
Eiginhandarrit sem er fyrirsagnarlaust er varðveitt í Árnastofnun í handritasafni Konráðs Gíslasonar (KG 31 a II).
Frumprentun í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn