Fylgstu með okkur á Facebook

Leiðarljóð

til herra Jóns Sigurðssonar alþingismanns
  • Byr um gráð þig beri
  • bugþægur, flugnægur;
  • frói þér á flóa
  • fundur Ísagrundar.
  • Sjáðu land, er leiðir
  • ljós um bláa ósa
  • glöðust sól, og glæðir
  • Glámutind í vindum.
  •  
  • Tygja þá, og teygja
  • tá láttu jó gráan
  • (hvítur hæfir snotrum
  • hestur framagesti);
  • móður fyrst og föður
  • finndu – svo í skyndi
  • reið um háar heiðar
  • hertu slyngr að þingi.
  •  
  • Hyggjum víst, að vestan
  • ver ókunnan beri
  • (járnum jörðu spornar
  • jór) að klifi stóru;
  • þá er sem að sjáum:
  • sveif bifan þig yfir
  • hvarmahreggs, á barmi
  • hám Almannagjáar.
  •  
  • Breiðir kvöldið blíða
  • bláan yfir sjáinn
  • ljósa blæju, hýsa
  • hængir í marsængu;
  • hátt um hraunið kletta
  • hylja runnar, dylja
  • kjarngrös kaldar firnir,
  • knýr ramur foss hamar.
  •  
  • Búðafjöldinn báða
  • bakka fríða skrýðir
  • Öxarár – en vaxa
  • eina þar um steina
  • möðrur mjög, og öðrum
  • mjúk túnblæja hjúkrar,
  • hunangsfluga holu
  • hyggin marga byggir.
  •  
  • Autt er enn að mönnum
  • alþingi – talslyngra
  • hölda (hvað mun valda?)
  • hafa reiðir tafist.
  • Nei, ef satt skal segja,
  • sunnanfjalls þeir spjalla;
  • þingið fluttu þangað
  • þeir á kalda eyri.
  •  
  • Hlýjan bústað býja
  • biðjum þér að liði
  • verða – þiggðu værðir
  • værar á grund kærri.
  • Elt svo hina! haltu
  • hugprúður til búða
  • Víkur – við þig leiki
  • völin á mölinni.
Samið árið 1845.
Eiginhandarrit er varðveitt í Árnastofnun handritasafni Konráðs Gíslasonar (KG 31 a II).
Frumprentun: Smáörk fyrir samsæti sem Íslendingar héldu Jóni Sigurðssyni 29. apríl 1845 í tilefni alþingisfarar hans.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn