Fylgstu með okkur á Facebook

Móðurást

  • Fýkur yfir hæðir og frostkaldan mel,
  • í fjallinu dunar, en komið er él,
  • snjóskýin þjóta svo ótt og ótt;
  • auganu hverfur um heldimma nótt
  • vegur á klakanum kalda.
  •  
  • Hvur er in grátna sem gengur um hjarn,
  • götunnar leitar, og sofandi barn
  • hylur í faðmi og frostinu ver,
  • fögur í tárum, en mátturinn þverr –
  • hún orkar ei áfram að halda.
  •  
  • „Sonur minn góði! þú sefur í værð,
  • sérð ei né skilur þá hörmunga stærð
  • sem að þér ógnar og á dynja fer;
  • eilífi guðssonur! hjálpaðu mér
  • saklausa barninu’ að bjarga.
  •  
  • Sonur minn blíðasti! sofðu nú rótt;
  • sofa vil eg líka þá skelfingarnótt;
  • sofðu! ég hjúkra og hlífi þér vel;
  • hjúkrar þér móðir, svo grimmasta él
  • má ekki fjörinu farga.“
  •  
  • Fýkur yfir hæðir og frostkalda leið,
  • fannburðinn eykur um miðnæturskeið;
  • snjóskýjabólstrunum blásvörtu frá
  • beljandi vindur um hauður og lá
  • í dimmunni þunglega þýtur.
  •  
  • Svo, þegar dagur úr dökkvanum rís,
  • dauð er hún fundin á kolbláum ís;
  • snjóhvíta fannblæju lagði’ yfir lík
  • líknandi vetur – en miskunnarrík
  • sól móti sveininum lítur.
  •  
  • Því að hann lifir og brosir og býr
  • bjargandi móður í skjólinu hlýr,
  • reifaður klæðnaði brúðar – sem bjó
  • barninu værðir, og lágt undir snjó
  • fölnuð í frostinu sefur.
  •  
  • Neisti guðs líknsemdar ljómandi skær,
  • lífinu bestan er unaðinn fær,
  • móðurást blíðasta! börnunum háð,
  • blessi þig jafnan og efli þitt ráð
  • guð, sem að ávöxtinn gefur.
Samið árið 1837.
Eiginhandarrit er ekki til.
Frumprentun í: Fjölnir 3. ár, 1837.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847. [Fyrirsögn: „Grikkur“].
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn