Fylgstu með okkur á Facebook

Saknaðarljóð

  • Þá var eg ungur
  • er unnir luku
  • föðuraugum
  • fyrir mér saman;
  • man eg þó missi
  • minn í heimi
  • fyrstan og sárstan
  • er mér faðir hvarf.
  •  
  • Man eg afl andans
  • í yfirbragði
  • og ástina björtu
  • er úr augum skein.
  • Var hún mér æ
  • sem á vorum ali
  • grös in grænu
  • guðfögur sól.
  •  
  • Man eg og minnar
  • móður tár
  • er hún aldrei sá
  • aftur heim snúa
  • leiðtoga ljúfan,
  • ljós á jörðu
  • sitt og sinna –
  • það var sorgin þyngst.
  •  
  • Mjög hefi’ eg síðan
  • til moldar ganga
  • ættmenni best
  • og ástvini séð.
  • Þá vill hugur
  • harma telja
  • þegar böl búið
  • er brjósti nýtt.
  •  
  • Sá eg inn góða
  • er guði treysti,
  • ungan og öflgan,
  • ættjarðar von,
  • Lárus á bana-
  • bólstur hniginn,
  • líki líkan
  • er eg land kvaddi.
  •  
  • Sá eg með Dönum
  • í dauðra reit
  • Baldvin úr bruna
  • borinn vera –
  • fríða, fullstyrka
  • frelsishetju.
  • Söknuður sár
  • sveif mér þá að hjarta.
  •  
  • Sá eg Torfa –
  • tryggðreyndan vin,
  • hraustan, hreinskilinn
  • og hjartaprúðan –
  • lífi ljúka
  • og lagðan vera
  • ættjörðu fjær
  • er hann unni mest.
  •  
  • Átti ég eftir
  • enn í heimi
  • ungan og fagran
  • ættarblóma;
  • vel mundi kæta,
  • vel mundi bæta
  • laufgrænn kvistur
  • lágan runna.
  •  
  • Það man eg yndi
  • öðru meira
  • er við Skafta
  • skilning þreyttum
  • eður á vænum
  • vinafundi
  • góða, geðspakur,
  • á gleði jók.
  •  
  • Sá eg þig, frændi!
  • fræði stunda
  • og að sælum
  • sanni leita;
  • þegar röðull
  • á rósir skein
  • og bládögg beið
  • á blómi sofanda.
  •  
  • Er þú á hæsta
  • hugðir speki
  • og hátt og djúpt
  • huga sendir.
  • Oft eru myrk
  • manna sonum,
  • þeim er hátt hyggja,
  • in helgu rök.
  •  
  • Brann þér í brjósti,
  • bjó þér í anda
  • ást á ættjörðu,
  • ást á sannleika.
  • Svo varstu búinn
  • til bardaga
  • áþján við
  • og illa lygi.
  •  
  • Nú ertu lagður
  • lágt í moldu
  • og hið brennheita
  • brjóstið kalt.
  • Vonarstjarna
  • vandamanna
  • hvarf í dauðadjúp –
  • en drottinn ræður.
Samið árið 1836.
Eiginhandarrit er ekki til.
Frumprentun í: Fjölnir 3. ár, 1837.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn