Fylgstu með okkur á Facebook

Sæunn hafkona

  • Þokan yfir vík og vogi
  • votu fangi þögul grúfir,
  • gnauðar fyrir svölum sandi
  • sjór, en þegja vindar ljúfir.
  •  
  • Báran smáa strýkur steini
  • (steinn er fyrir þangi bleikur)
  • eins og sér á köldum karli
  • konan ung að hári leikur.
  •  
  • Hvað er á vogi? hafmey fögur!
  • hratt hún fer og snýr að landi,
  • leika fyrir björtu brjósti
  • bárur ungar sívakandi.
  •  
  • Skáldið:
  • Hafmey fögur! hvaða, hvaða!
  • hárið bleikt af salti drýpur;
  • vel skal strjúka vota lokka
  • vinur þinn, sem hjá þér krýpur.
  •  
  • Sæunn:
  • Djúpt á mjúkum mararbotni
  • marbendlar mér reistu höllu;
  • hingað svam eg hafs um leiðir,
  • hárið er því vott með öllu.
  •  
  • Skáldið:
  • Hafmey fögur! hvaða, hvaða!
  • hönd og fótur – aldrei slíka
  • sá eg mynd í sólarheimi,
  • sinn þau eiga hvurgi líka.
  •  
  • Sæunn:
  • Ein er gyðjan öllum fremri
  • áður löngu úr hafi gengin,
  • fljóða prýði, fíra gleði,
  • fegri mér, og síðan engin.
  •  
  • Skáldið:
  • Hafmey fögur! hvaða, hvaða!
  • háls og brjóst að þúsundföldu
  • álitlegri eru og skærri
  • en „Albert“ hjó úr steinum völdu.
  •  
  • Sæunn:
  • Ástarguð við brjóst mér beygði
  • boga sinn í fyrri daga,
  • fyrirmynd því fann hann enga
  • fegri – það er gömul saga.
  •  
  • Skáldið:
  • Hafmey fögur! hvaða, hvaða!
  • köld er þú sem mjöll á ísi,
  • engi roði kviknar á kinnum,
  • kærum yl þótt augun lýsi.
  •  
  • Sæunn:
  • Bý eg undir kristallkrossi,
  • kaldri skemmu straumar svala;
  • bleikar eru bárudætur,
  • blóðið er rautt í þernum dala.
  •  
  • Skáldið:
  • Hafmey fögur! hvaða, hvaða!
  • hjartað berst og slær af mæði;
  • hallaðu að mér höfði þínu,
  • hvíldu þig svo og þiggðu næði.
  •  
  • Sæunn:
  • Hjartað berst og hjartað titrar,
  • hjartað slær og berst af mæði,
  • því eg ann þér miklu meira,
  • mannsmynd kær! en um eg ræði.
Samið árið 1843.
Eiginhandarrit er ekki til.
Frumprentun í: Fjölnir 6. ár, 1843.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn