Fylgstu með okkur á Facebook

Söknuður

  • Man eg þig, mey!
  • er hin mæra sól
  • hátt í heiði blikar;
  • man eg þig, er máni
  • að mararskauti
  • sígur silfurblár.
  •  
  • Heyri’ eg himinblæ
  • heiti þitt
  • anda ástarrómi;
  • fjallbuna þylur
  • hið fagra nafn
  • glöð í grænum rinda.
  •  
  • Lít eg það margt
  • er þér líkjast vill
  • guðs í góðum heimi:
  • brosi dagroða,
  • blástjörnur augum,
  • liljur ljósri hendi.
  •  
  • Hví hafa örlög
  • okkar beggja
  • skeiði þannig skipt?
  • hví var mér ei leyft
  • lífi mínu
  • öllu með þér una?
  •  
  • Löngum mun eg,
  • fyrr hin ljósa mynd
  • mér úr minni líði,
  • á þá götu,
  • er þú ganga hlýtur,
  • sorgaraugum sjá.
  •  
  • Sólbjartar meyjar
  • er eg síðan leit,
  • allar á þig minna;
  • því geng eg einn
  • og óstuddur
  • að þeim dimmu dyrum.
  •  
  • Styð eg mig að steini,
  • stirðnar tunga,
  • blaktir önd í brjósti;
  • hnigið er heimsljós,
  • himinstjörnur tindra –
  • eina þreyi’ eg þig.
Samið á árunum 1829-1832.
Eiginhandarrit [fyrirsagnarlaust] er varðveitt í Árnastofnun í handritasafni Konráðs Gíslasonar (KG 31 b I).
Frumprentun í: Fjölnir 6. ár, 1843. [Fyrirsögn: Söknuður].
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847. [Samkvæmt frumprentun í Fjölni].
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn