Fylgstu með okkur á Facebook

Til herra Páls Gaimard

  • Þú stóðst á tindi Heklu hám
  • og horfðir yfir landið fríða,
  • þar sem um grænar grundir líða
  • skínandi ár að ægi blám;
  • en Loki bundinn beið í gjótum
  • bjargstuddum undir jökulrótum –
  • þótti þér ekki Ísland þá
  • yfirbragðsmikið til að sjá?
  •  
  • Þú reiðst um fagran fjalladal
  • á fáki vökrum götu slétta,
  • þar sem við búann brattra kletta
  • æðandi fossar eiga tal,
  • þar sem að una hátt í hlíðum
  • hjarðir á beit með lagði síðum –
  • þótti þér ekki Ísland þá
  • íbúum sínum skemmtan ljá?
  •  
  • Þú komst á breiðan brunageim
  • við bjarta vatnið fiskisæla,
  • þar sem við áður áttum hæla
  • frístjórnarþingi frægu’ um heim;
  • nú er þar þrotin þyrping tjalda,
  • þögult og dapurt hraunið kalda –
  • þótti þér ekki Ísland þá
  • alþingi svipt með hrellda brá?
  •  
  • Nú heilsar þér á Hafnarslóð
  • heiman af Fróni vinaflokkur;
  • við vitum glöggt að anntu okkur,
  • frakkneskur maður frjálsri þjóð;
  • því andinn lifir æ hinn sami
  • þótt afl og þroska nauðir lami.
  • Menntanna brunni að bergja á
  • besta skal okkur hressing ljá.
  •  
  • Vísindin efla alla dáð,
  • orkuna styrkja, viljann hvessa,
  • vonina glæða, hugann hressa,
  • farsældum vefja lýð og láð;
  • tífaldar þakkir því ber færa
  • þeim sem að guðdómseldinn skæra
  • vakið og glætt og verndað fá
  • viskunnar helga fjalli á.
  •  
  • Þvílíkar færum þakkir vér
  • þér sem úr fylgsnum náttúrunnar
  • gersemar, áður aldrei kunnar,
  • með óþreytanda afli ber.
  • Heill sé þér, Páll! og heiður bestur!
  • hjá oss sat aldrei kærri gestur.
  • Alvaldur greiði æ þinn stig!
  • Ísland skal lengi muna þig.
Samið árið 1839.
Eiginhandarrit er varðveitt í Konunglega bókasafninu í Kaupmannahöfn [Ny kgl. samling 3282 4to].
Frumprentun í: Sérprent frá 16. janúar 1839 fyrir samsæti til heiðurs Paul Gaimard: „Til Herra Páls Gaimard I samsæti Islendinga i Kaupmannahöfn. Þann 16. Janúarí 1839“.
Einnig prentað í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.
Til fróðleiks
  • Áhersla á nýyrði á degi íslenskrar tungu 2018
  • Nýyrðasmíð Jónasar í Orðbragði
  • Vísubotn 2018 - vísnasamkeppni grunnskólanema
  • Grein um steinasöfn Jónasar í Náttúrufræðingnum
  • Enn finnast bréf Jónasar
  • Raddir íslenskunnar 2017 - örmyndbönd
  • Jarðeldasaga Íslands
  • Nýr fánadagur - Dagur íslenskrar tungu
Landsbókasafn Íslands - Háskólabókasafn