(Heinrich Heine)
Berst mér þá hjarta,
hugur er á reiki,
þá er mál munni
mínum horfið –
bláeyg, bjarteyg,
brosfögur mær!
indæl, ástúðleg,
er á mig lítur.
Augun þín blá
fyrir augum mér
sædjúp og hrein
sí og æ standa;
bláöldur blíðastar
blárra drauma
hjartað mitt ungt
yfir haf bera.
Samið á árunum 1843-1844.
Eiginhandarrit er varðveitt í Árnastofnun í handritasafni Konráðs Gíslasonar (KG 31 a II).
Frumprentun í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.