Riðum við fram um flæði
flúðar á milli’ og gráðs,
fyrir Ólafsvíkurenni,
utan við kjálka láðs.
Fjörðurinn bjartur og breiður
blikar á aðra hlið,
tólf vikur fullar að tölu,
tvær álnir hina við.
Hvurt á nú heldur að halda
í hamarinn svartan inn,
ellegar út betur til þín?
Eggert, kunningi minn!
Annes og eyjar:
(Með mottó: „hann er farinn að laga sig eftir Heine“)
Eiginhandarrit er varðveitt í Árnastofnun í handritasafni Konráðs Gíslasonar (KG 31 a II).
Frumprentun í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.