Sól rís sæl
úr svölum straumum
austurdjúps
að eyða dimmu;
leiðinda langverk
á ljósgjafi:
heimskan hnött
úr húmi slíta.
Er þú glöðum
geislum hefir
hálfan heim
himni unnið
og skundar skært
skin margauka,
æ og sí austræn
þig eltir nótt.
Stritar við stein
sterkur Sisýfus,
dætra Danáu
drýpur æ úr keri;
svo veltir sífellt
sér úr ljóma
sjálfri fold
í sorta nætur.
Þýtt árið 1845.
Eiginhandarrit er varðveitt í Árnastofnun í handritasafni Konráðs Gíslasonar (KG 31 a II).
Frumprentun í: Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847.