Að utan og sunnan og austan eg spyr,
að á séu vestrinu stóreflisdyr,
og eins langt og mannsauga út um þær sér
sé ekkert af neinu’ og í hurðinni gler.
Hann Brynjólfur veltist um bárur á kút
að búðarhurð þeirri, og gægðist þar út,
og kallar og segir: „eg kom hér um sinn
að kaupa mér seytil á legilinn minn.“
Og svo er mér frá skýrt, að lýður þess lands
það léti, sem til var á „pyttluna“ hans;
og svo valt hann aftur og settist í bú,
og segir: „guðvelkomnir! drekkið þér nú.“
Vér lofum og prísum þann metnaðarmann,
til mikilla stórlauna kaupför hans vann,
því ókeypis veitir hann öllum og jafnt,
og aldregi lækkar á „pyttlunni“ samt.
Hann lifi og ríki nú leglinum á!
vér lofum og prísum hann héðan í frá;
en tappann úr vestkútnum taka er mál
og tæma svo höfðingjans kaupfararskál.
Samið 1845
[Ein nýgjörð og gamansöm bindindisvísa, er heitir: „Vesturför velborins herra Brynjólfs sýslumanns P.S.“ og öðru nafni: Kaupfararskál]
Tvö eiginhandarrit til bæði í Konráð Gíslason [31 a II] mappa með margvíslegu efni frá Jónasi. Handritasafn Konráðs Gíslasonar (Í Árnasafni í Khöfn).
Frumprentun í Ljóðmæli eptir Jónas Hallgrímsson. B. Pjetursson og K. Gíslason hafa sjeð um prentunina. Khöfn 1847 [Fyrirsögn: „Vesturför“, undirtitill: „Ein spáný og gamansöm bindindiskviða“].